السؤال والحَل

السؤال والحَل





تعال أبَرْضي مرادك وارضي مْرادي

سؤال صَدِّكْ وْصَدِّي واضحٍ حَلّه

وِشّو له أسْرَحْ بوادي وانت في وادي

والكل مِنّا عزيز ويكره الذلّه

هذا طريق السعاده والله الهادي

ما فيه داعي نضيع ودربنا نْدلّه

أدري تبيني أجيك وما تبي تْنَادي

مثلي وانا اضحك ودمعي دايم آهِلّه

المشكله إنّي شرابك وانت لي زادي

بس البلا إنّا نعَقْد حْبال مِنْحَلّه

إتْرِكْ كلام التحدي من هو البادي؟

الكل مِنَّا على الثاني يبي الزلّه

توجعني وِتْقول بِعْدك ثالث أعيادي

واكمام ثوبك من الهجران مبْتَلّه

نكذب نكابر نقول إن الوَضِعْ عادي

أدري وتدري وْكِلٍ مَيِّتْ بْخِلّه

أنا ادري إنّك بدوني تايه وْ غادي

وانا بدونك حزين وْعِلّتي عِلّه

أعْرِفْ بلادك وْمِثْلي تعْرف بْلادي

ما فيه داعي نضيع ودربنا نْدلّه


شعر: فيصل الباهلي

الف شكرا
حبيبتي
على نقل
الشعر الحلووووووووووووووووووووووووووووو